الشغل في مصر في ظل الاوضاع الاقتصادية الحالية عبارة عن انك بتجري بعربية كل كاوتشهات بايظة وانت ماشي اصلا في ارض رمليا وحاجه في منتهي النفخ في قربة مقطوعة فعليا .
وللاسف اكتر فئة حاليا طالع روحها هي فئة الشباب اللي كل حاجه بتزيد عليه الا دخله كل شوية يقل بسبب فقدان العملة لجزء من قيمتها والشباب مطحون بين بنك فيدرالي امريكي شغال يرفع في الفائدة وبنك مركزي عندنا شغال يوقع في العملة وايام سودة يعم علي ورايحين علي كوارث كل يوم .
طيب عشان تعمل قرشين يابني الحلال هقولك علي كام نصيحة حطهم في محفظتك الفاضية ماحنا كلنا في الهواء سوا
اولا : مفيش حاجه اسمها استمعت بشبابي ، ايوة زي ما بقولك كدا بالظبط ، انت يصحبي للاسف زي البقرة اللي مربوطة في ساقية وكمان مغمين عينك عشان متشوف فتتكلم فيطلعلك صوت فتصدعنا .
ثانيا : اشتغل 374 حاجه في اليوم والنوم تخططيف ، ايوة نام وانت في الشغل ما ده العادي في مصر .
ثالثا : اللي اهم من الشغل مفيش صدقني عشان لو مشتغلتش هتموت من الجوع ، الله يكون في عونك وعوني
رابعا : صاحب الشغل حتي لو لامؤاخذة ح*ار هو بيفهم اكتر منك ، اشتغل وانت ساكت بقي 😷👊👀😂
خامسا : ودي بجد بقي لازم تفكر في نفسك يا صحبي ومتعمتدش علي لمرتب ولازم تسعي يكون ليك كيان وشغل خاص حتي لو في البداية هيدخل ميلاميم ، ابقي صغير تكبر ، لكن لوحبيت تبدأ كبير يبقي انا جاي افوقك واقولك فوق يعم علي محدش بيكبر غير لما بيبدا صغير .
سادسا : ساعد غيرك وهتلاقي الخير جايلك جري حتي لو مش في وقت " ربنا مش بيبات مديون " ارمي خبزك علي وجه المياه فانك بعد ايام كثيرة تجده
سابعا : اشتغل بعقلك اكتر من ايديك ، اغني اغنياء العالم وصلوا للغني بتاعهم ده عشان شغلوا عقولهم ووظفوا الامكانيات المتاحة توظيف سليم بالاضافة لقدرتهم علي قيادة الفريق لتحقيق الهدف .
ثامنا : خلي اخر اهدافك من العمل هي الفلوس ، ابني كيان واعمل شغل مظبوط ومتقلقيش يعم علي الفلوس كدا كدا هتيجي .
تاسعا : الاستثمار اولا واخيرا هو الحل لتحقيق اهدافك المالية ، بس يعم علي استثمار فاهمه ومحسوب بمغامرة محسوبة وصدقني هتواصل .
عاشرا : في الغالب مشروعك الاول مش هينجح ، فخلي نفسك طويل وجرب مرة واتنين وعشرة بس زي ما قولتلك فوق 👆 مغامرة محسوبة وعارف لو نجحت هتروح فين ولازم تحط في حسابك الفشل او مش الفشل " نقول ان التوقعات مكنتش دقيقة عشان كدا حصل هذا الاخفاق البسيط بس انا هرجع اعدل وهرجع زي الاول واحسن .
خدي شوية الحكاوي دول وانت هتوصل صدقني
ايلون ماسك شركته كانت علي وشك اعلان افلاسه واتعرضت للبيع بس المدير التنفيذي لشركة امازون اتخلف عن الميعاد والزهر لعب وبقي حاليا ايلون ماسك اغني رجل في العالم بثروة تتعدي 257 مليار دولار ، اللهم لا حسد 😓
توماس اديسون جرب 1000 طريقة عشان يوصل للمصباح الكهربائي اللي بفضله احنا حاليا بنشوف بعض بالليل وحضرتك قادر تشوف الموضوع ده
الراجل بتاع كنتاكي حقق ثروته بعد سن ال 65
متسمعيش يا صديقي لاي كلام محبط ، انت مخلوق الله المميز واللي قادر علي صنع المعجزات ، ابدأ مشوار ال 1000 ميل وهتوصل صدقني