انه الاحد يا سادة يوم ملئ بالاثارة ومتعة وقمة كرم القدم العالمية ، يوم الكلاسيكو هو اعظم ايام كرة القدم ، واي كلاسيكو اعظم من كلاسيكو ريال مدريد وبرشلونة في الدوري الاسباني وزيادة في المتعة الدوري الانجليزي النهاردة حاطلنا قمة ضرب نار بين الليفر والمان سيتي " بيبي جوارديولا ويورجن كلوب ومنافسة مستمرة بينهم من اكتر من 5 سنوات .
تعالوا ناخدهم مباراة مباراة
نبدأ بالقمة الاعظم في تاريخ كرة القدم العالمية
ريال مدريد & برشلونة
قائمة الريال كاملة باستثناء غياب افضل حارس في العالم تيبو كورتو بسبب الاصابة 😓ودانا سيبابوس برضه بداعي الاصابة
التشكيل المتوقع للمرينجي ريال مدريد بقيادة انشلوتي
حراسة مرمي الريال النهاردة هتبقي بالحارس الاكرواني الشاب لونين
خط الدفاع هيبقي من الخال كارفخال وصاحب الكرسي ديفيد الابا وجنبهم عم البرازيلين كلهم ميلتاو والناحية الشمال المعلم ميندي
نص ملعب الريال هيبقي ارتكاز تشواميني اللي عوض جدا مكان الدبابة البرازيلية كاسميرو جنبه عم خطوط الوسط في العالم لوكا مودريتش وجنبه الفنان الكبير اوي توني كروس
خط الهجوم هيبقي علي الشمال واستر يا ستار الفتي البرازيلي الذهبي فين" وعلي اليمين اللي كلنا بنحبه المعلم فالفيردي " فلفل "
قائمة برشلونة شهدت عودة كوندي واستمرار غياب اراخو وكرستنيس وبريلين
التشكيل المتوقع لتشافي اليوم
حراسة المرمي تير شتيجن
خط الدفاع كوندي وبيكيه واريك جارسيا وبالدي في الشمال
خط الوسط سرجيو بوستكيس وبيدري وجافي
الهجوم الكتالوني اليوم هيبقي ديمبيلي وليفا ورافينيا البرازيلي
اتوقعها مباراة قوية ولكن حذرة من الطرفين ومفيش افضيلة لفريق عن التاني ، الضغوط اكتر علي برشلونة خصوصا مع اقتراب توديعهما لدوري ابطال اوروبا والهبوط للدوري الاوروبي للمرة الثانية في اخر 20 عام والمرتين تحت قيادة تشافي
كمدريدي اتمني الفوز للريال 😍🙈
القمة الانجليزي بين ليفربول ومانشستر سيتي " جوارديولا وكلوب "
هالاند ومو صلاح
الانظار النهاردة كلهاعلي الساعة 30 : 5 مساءا هتتجه لملعب الانفيلد لقمة وكلاسيكو البرلميرليج ومباراة زعماء الدوري الانجليزي والكرة الانجليزية اخر 6 سنوات علي الصعيدين المحلي والاوروبي
السيتي اللي طايح في الكل في الدوري ويجي دوري الابطال قدام المرينجي يقلب بطة بلدي
ولليفر اللي مع يورجن كلوب رجع سكة البطولات واللعب الجميل باقل الامكانيات والصرف المادي ، بعيدا عن محتوي الموضوع بس انا من محبين الراجل ده جدا وشايف انه افضل مدرب في العالم ، نكمل موضوعنا
السنادي السيتي زي كل سنة طايح في الكل ومحدش قادر يوقفه واللي كمل وخلالهم اقوي من الاول وجود المهاجم النرويجي هالاند مكنة الاهداف التي لا تتوقف اللي خلي من الدوري الانجليزي يا سادة دورة رمضانية في حاروي امبابة 😂 ، الواد شغال يجيب هاتريك وكأنه بند في العقد ي مؤمن 😃😂
الليفر وبداية ضعيفة جدا مقارنة بالمواسم السابقة وكله اشتغل يتكلم عن تاثير راحيل ساديو ماني لفريق بايرن ميونخ ، واللي انا بصراحة ضد هذه الفكرة ، منكرش ان ساديو ماني ليه تاثير بس انا شايف ان التاثير الاكبر هو ان معظم اللاعيبة اللي في فريق الليفر جالهم حاجه من اتنين ياما فيهم ناس بتشبع من بطولتين تلاتة ، ياما حتة الاحباط بعد خسارة اتنين دوري بفرق نقطة عن السيتي ومستوي السنة السنادي اللي بيقول انه خلاص حسم بطولة الدوري ، بالاضافة للاسباب دي في لاعيبة كتيرة انتهت صلاحيته مع الليفر وكمان يورجن كلوب لازم يدور علي تحدي جديد بعيد عن الليفر .
المهم خلينا في مباراة النهاردة ، انا شايف ان الماتش متكافئ حتي مع هبوط مستوي الليفر ، لان ماتشات يورجن كلوب وبيبي جوارديولا بيحكمها التنافس اللي بينهم مش مستوي الفريقين واتوقع ان ماتش النهاردة يبقي بداية الصلح بين لاعيبة الليفر وجماهير الانفيلد اللي هتساند الفريق حتي النهاية
نستني ونشوف لاخر اليوم ايه اللي هيحصل ، مع اني اتمني فوز الليفر لكذا سبب
الاول عشان خاطر محمد صلاح الاسطورة المصرية الحية فخر العرب 😍😍
ثانيا عشان التنافس في الدوري يستمر لفترة اكبر
ثالثا عشان الارسنال فايق واتمني انه يحقق الدوري السنادي لان مفيش بني اعتقد مش بيحب الارسنال ولعبهم الممتع باقل الامكانيات